ब्रेकिंग न्यूज़

३२०० कोटींच्या टीडीएस घोटाळ्याचा पर्दाफाश

आयकर विभागाने ३२०० कोटी रुपयांच्या टीडीएस (TDS) घोटाळ्याचा पर्दाफाश केला आहे. हा घोटाळा करणाऱ्या ४४७ कंपन्यांची माहिती विभागाला मिळाली आहे. या कंपन्यांनी त्यांच्या कर्मचाऱ्यांच्या वेतनातून टीडीएस कपात केली. मात्र ती रक्कम सरकारकडे जमा केली नाही. याउलट टीडीएसचे पैसे कंपनीतच गुंतवले, अशी धक्कादायक माहिती समोर आली आहे. या घोटाळ्याप्रकरणी गुन्हे दाखल करण्याची प्रक्रिया सुरू झाली आहे. आरोपींमध्ये एका प्रसिद्ध बांधकाम व्यवसायिकाचाही समावेश आहे. तो राजकारणाशी संबंधित असून, त्यानं कर्मचाऱ्यांच्या वेतनातून कपात केलेली टीडीएसची रक्कम स्वतःच्या व्यवसायासाठी वापरली आहे. अन्य आरोपींमध्ये प्रॉडक्शन हाऊसपासून इन्फ्रा कंपन्यांचे मालकही आहेत. अलिकडेच केलेल्या पडताळणीमध्ये अशी ४४७ प्रकरणे उजेडात आली आहेत. कंपन्यांनी कर्मचाऱ्यांच्या वेतनातून टीडीएस स्वरुपात ३२०० कोटी रुपये घेतले. मात्र, ती रक्कम सरकारच्या तिजोरीत जमा केली नाही. या प्रकरणी काही जणांवर अटकेची कारवाई केली जाणार आहे. ही आकडेवारी एप्रिल २०१७ ते मार्च २०१८ पर्यंतची आहे, अशी माहिती एका आयकर अधिकाऱ्याने दिली. सूत्रांच्या माहितीनुसार, घोटाळ्यात सहभागी असलेल्या कंपन्यांचे बँक खाते गोठवण्याची प्रक्रिया सुरू केली आहे. काही कंपन्यांनी माफी मागितली असून, पैसे परत करण्याचे आश्वासन दिले आहे. सूत्रांच्या माहितीनुसार, आयकर विभागाच्या टीडीएस शाखेने संबंधित कंपन्यांची चौकशी सुरू केली आहे. अनेक जणांविरोधात वॉरंटही जारी केले आहे. या घोटाळ्यातील आरोपी कंपन्या आणि त्यांच्या मालकांविरोधात कारवाई करण्यात येत आहे. प्राप्तिकर कायद्यांतर्गत या प्रकरणांत दंड आणि तीन महिने ते सात वर्षे कारावासही होऊ शकतो.

Leave A Comment